Graniti pa pushim, Prishtina fiton

Granit Rugova ka qenë për 40 minuta në fushë sonte, derisa Prishtina ka vazhduar serinë e fitoreve në Superligë, duke i ngritur ato në 12.

Ylli ka qenë viktima e radhës së Prishtinës, që tashmë të gjitha forcat i ka kthyer në garat vendore, pasi që misioni europian përfundoi.

Pa Lis Shoshin dhe Andrew Lawrence të larguar, Sigal Prishtina ka hasur në rezistencë të fortë nga Ylli në pjesë të parë, ku suharekasit ishin në epërsi 42-40.

TABELA AKTUALE E SUPERLIGËS

Mirëpo, çereku i tretë 9-25 në të mirë të bardhekaltërve kampionë, ndërroi dukshëm rezultatin në semafor dhe në çerekun e fundit Prishtina e ruajti epërsinë, për fitore 68-83.

Granit Rugova ka luajtur për 40 minuta sonte te Prishtina, duke shënuar 23 pikë, 9 kërcime e 6 asistime në fitore, ndërsa 18 të tjera i shënoi Wayne Martin.

Te Ylli, që rezistoi mjaft dhe u paraqit denjësisht, Mike Harmon shënoi 22 dhe Altin Morina 18 pikë e 7 asistime ishin më efikasit.

Pas kësaj ndeshjeje, Prishtina ka bilanc 12-0, ndërsa Ylli 6-6.