Suhareka deklason Llapin, podujevasit nëntë xhiro pa fitore!

Fitore e thellë e Suharekës ndaj Llapit në ndeshjen përmbyllëse të xhiros së XVI në Superligë.

Skuadra e drejtuar nga Qëndrim Kida fitoi sot 4-0 ndaj Llapit, duke ia shkaktuar këtij të fundit humbjen e shtatë sezonale. Dy skuadrat e vetme të ligës me më shumë humbje se Llapi janë Dukagjini (9) e Nikli 74 (11). Ferizaj gjithashtu ka 7 humbje.

Mevlan Zeka, Nikola Stijepovic, Eneid Kodra dhe Lorik Boshnjaku u listuan te golashënuesit e vendasve sot, ndërsa dy asiste dhuroi Jakup Berisha e një tjetër Liridon Fetahaj, për ta kompletuar një paraqitje fantastike ekipore të skuadrës së Suharekës.

Në 22 minutat e parë të takimit suharekasit shënuan plot tri herë, duke shuar çdo dilemë për fituesin, e në pjesën e dytë Lorik Boshnjaku shënoi për përfundimtaren 4-0.

TABELA AKTUALE

Kështu Llapi nuk di për fitore në nëntë xhirot e fundit rresht të ligës, kurse Suhareka për momentin e sheh veten në vendin e pestë.

Në fundjavën që vjen, Suhareka i shkon Malishevës, kurse Llapi luan si mysafir i Ballkanit.