AUSTRALIAN OPEN 2017
Melbourne/ REUTERS/ Arkiv
Murray si bartës, Federer ka punë
13 January, 2017 @14:12
Në dy finalet e fundit të Australian Open, Novak Djokovic kishte mposhtur dy herë kundërshtarin e njejtë, Andy Murray. Serbi Djokovic ka 6 tituj të Australian Open dhe pritet që përsëri të ketë Murrayin përballë në finale, nëse nuk ndodh ndonjë befasi deri atëherë.
Nga 6 titujt e fituar, Djokovic 4 herë është ndeshur në finale me Murrayn, kurse ky i fundit ende asnjëherë në karrierë nuk e ka fituar turneun e parë Grand Slam të vitit që mbahet në verën australiane.
Skocezi Murray do t’ia nis për herë të parë si bartës i parë i turneut. Numri një i botës së tenisit, në xhiron e parë do të ketë përballë ukrainasin Illya Marchenko, që është i renditur në vendin e 93-të të ATP listës. Dyshja janë takuar vetëm njëherë në jetë mes vete deri tash, kur Murray e kishte mposhtur atë lehtë në vitin 2011.
Por, dueli i madh që mund ta pres Murrayin drejt finales është në çerekfinale, ku ai mund ta ketë përballë legjendën Roger Federer.
Në anën tjetër, mbrojtësi i trofeut, Djokovic, do t’ia nis garës vështirë, ku përballë do ta ketë spanjollin Fernando Verdasco. Verdasco ka eliminuar vitin e kaluar në Australian Open bashkëkombasin e tij Rafael Nadal në xhiron e parë, ndërsa në duelin e fundit ndaj Djokovic e çoi ndeshjen deri në 5 sete në Qatar Open.
Nëse nuk ndodh ndonjë befasi deri në çerekfinale, aty mund të zhvillohen këto duele: Murray - Federer, Wawrinka - Cilic, Monfils - Raonic dhe Thiem - Djokovic.
