Natë turke në Rio

Përfaqësuesit e Turqisë në mundje kanë qenë të pranishëm në të dy finalet e ditës në stilin e lirë të mundjes.

Kampioni i dyfishtë botëror në kategorinë deri 125kg në stil të lirë, turku Taha Akgul ka fituar edhe titullin olimpik. Ai në finale mposhti Komeil Ghasemin nga Irani me rezultat 3-1. Iraniani kishte fituar të bronztën në Londër, medalje me të cilën në Rio u stolisën Geno Petriashvili nga Gjeorgjia dhe Ibragim Saidov nga Bjellorusia.

Turku tjetër që ishte në finale sonte, Selim Yasar në kategorinë deri 86kg, humbi bindshëm nga rusi Abdul Rashid Sadulaev. Rezultati përfundimtar ishte 5-0 në të mirë të kampionit të dyfishtë botëror. Kampioni nga Londra në këtë kategori, Sharif Sharifov nga Azerbajxhani kësaj radhe mori vetëm të bronztën. Të njëjtën medalje mori edhe J’den Cox nga SHBA-të.