Të parët me dhjetë fitore, Ylli lider i Ligës Unike

Kampioni i edicionit të parë të Ligës Unike, Ylli, ka vazhduar me fitore në këtë ligë, duke e mposhtur sot Teutën e Durrësit në 13 qershori të Suharekës me rezultat 73-59 [18-16, 16-15, 20-14, 19-14].

Basketbollistët e drejtuar nga boshnjaku Adis Beciragic nuk kanë kaluar lehtë ndaj skuadrës që i ka shkaktuar humbjen e vetme këtë stinor në Ligë Unike, por dalëngadalë kanë arritur të shtojnë epërsinë për të hyrë në çerek të fundit me komoditet prej 9-pikësh epërsi.

Kjo, ka bërë gjithçka më lehtë për ata gjatë çerekut të fundit dhe me këtë fitore Ylli bëhet ekipi i parë që arrin shifrën prej 10 fitoreve këtë stinor në Ligën Unike, derisa rimerr kreun e renditjes tabelare me bilanc 10-1.

Teuta ka pësuar për heër të pestë këtë stinor në Unike, dhe tashmë ka bilanc 6-5.

Sa i përket performancës së basketbollistëve, Erjon Kastrati ka qenë më i miri në ekip. Reprezentuesi i Kosovës ka luajtur me 17 pikë, 4 asistime e 3 kërcime, derisa ka rrëmbyer 4 topa nga kundërshtari në fitore.

Malcolm Grant ka luajtur me 16 pikë e 5 asistime, kurse Mikaile Tmusic ka dhënë 11 pikë në ndeshje.

Te Teuta që ka qenë shumë e mirë gjatë gjithë ndeshjes, Tamas Bruce ka shënuar 13 pikë, kurse Tyler Peterson 12 të tjera.

Ekipi i Melzin Lazimit me këtë humbje mund të rrezikojë PlayOffin e Ligës Unike, derisa do të ketë mundësi këndelljeje në tri xhirot e mbetura të stinorit të rregullt.

LIGA UNIKE, MESHKUJT - TABELA AKTUALE:

1	Ylli	10-1
2	Peja	8-3
3	Prizreni'16	7-4
4	Teuta	6-5
5	Tirana	5-6
6	Rahoveci	4-7
7	Vllaznia	2-9
8	Kamza	2-9