Drita e nis me fitore, pasi që Ferizaji mbeti me një lojtar më pak në fushë

Pas tre ndeshjesh të shtyera për shkak të pjesëmarrjes në kualifikime për gara evropiane, Drita ka nisur Superligën me vonesë. Sidoqoftë, ekipi i Zekirija Ramadanit ka arritur të shënojë fitore dhe t’ia nis mbarë stinorit, duke shënuar fitore në duelin e saj të parë të stinorit në kuadër të xhiros së katërt, pasi që mposhti Ferizajin në shtëpi.

Pjesa e parë kaloi pa gola, ndërsa kartoni i kuq i Ferizajit, pas dy të verdhave të shpejta të Arlind Shabanit (33’ dhe 35’) i hapi rrugë Dritës për fitore në pjesë të dytë edhe pse rastin fillestar në pjesë të dytë e patën mysafirët përmes Edon Sadriut.

TABELA AKTUALE & REZULTATET

Ka qenë Almir Ajzeraj që shënoi për epërsi (73’) pas asistimit të Besnik Krasniqit, ndërsa golashënuesi i golit të parë asistoi te Arb Manaj për 2-0 (90’). Pesë minutat shtesë të ndeshjes sollën edhe dy gola, kur Ferizaji fitoi penallti ndërsa Erion Sadriu e konvertoi në gol (90’+3) 2-1, e Drita vulosi rezultatin përfundimtar me Ilir Mustafën, për të cilën asistoi përvoja e Besnik Krasniqit (90’+5). Drita 3-1 Ferizaji [Almir Ajzeraj 73’, Arb Manaj 90’, Ilir Mustafa 90’+5 - Erion Sadriu 90’+3].

Me fitore, Drita merr tre pikët e para të stinorit në ndeshjen e parë të zhvilluar, derisa ka tri ndeshje për të kompenzuar në muajt e mëvonshëm para fundit të pjesës së parë të stinorit. Ferizaji në anën tjetër ka pësuar humbjen e dytë kampionale në 4 ndeshjet e luajtura dhe ka 4 pikë dukë qëndruar pas katër xhirosh në pozitën e shtatë.