Trepça bën dallimin në çerek të fundit dhe nuk lejon befasinë!

Vetëm në çerek të fundit Trepça ka arritur të shkëputet në rezultat dhe të sigurojë fitoren ndaj Borës, që do të debutojë në Superligë këtë stinor. Trepça e Adis Becirigacit ka nisur mbarë stinorin e ri në ndeshjen e parë zyrtare, në kuadër të çerekfinales së Superkupës së Kosovës, duke e fituar ndeshjen ndaj Borës së Arben Krasniqit me 9 pikë dallim në fund, 85-76.

Por, rezultati përfundimtar nuk ishte pasqyrë e asaj që ndodhi në parket deri në minutën e 35-të të ndeshjes. Bora është treguar jashtëzakonisht e fortë në duel me ekipin mitrovicas dhe pos që ka mbyllur pjesën e parë në epërsi, 41-44, prishtinasit kanë qenë përpara me rezultat edhe kah fillimi i çerekut të katërt të ndeshjes.

Sammy Hunter me 24 pikë, 2 asistime e 12 kërcime ishte koshashënuesi më i mirë i Trepçës në përballjen e parë të turneut të Superkupës, që filloi sonte në “Sezai Surroi” të Prizrenit. Me 18 pikë ia nisi “punës” së tij Larry Thomas, që bëri edhe 6 asistime e 7 kërcime. Mikaile Tmusic luajti me 11 pikë, 4 asistime e 4 kërcime.

Te Bora, që tregoi se do të jetë arrë e fortë në Superligë dhe nuk është aty për shtëtitje njësezonale, me 24 pikë e 6 kërcime u dallua Isaiah Mosley, ndërsa 23 pikë, 7 asistime e 6 kërcime i bëri Clay Jr.

Me këtë fitore, Trepça siguron gjysmëfinalen e Superkupës, ndërsa Bora eliminohet nga turneu, por do të ketë kohë për përgatitje edhe më të fuqishme për stinorin e ri në Superligë ku do të debutojë.