Bashkimi për herë të dytë me radhë fiton Kupën

Skuadra e vajzave të Bashkimit nga Prizreni, ka shënuar fitore në finale të Kupës së Kosovës ndaj Prishtinës dhe kështu ka fituar për të dytën herë radhazi Kupën e Kosovës në basketboll.

Ekipi prizrenas që drejtohet nga trajneri Kovac, ka pasur një dallim të vogël në pjesë të parë të ndeshjes, 43-38, për ta ngritur atë në pjesë të dytë, veçanërisht në çerek të tretë 27-15, ashtu që të shkojnë sigurt te trofeu i radhës i Kupës me përfundimtaren 94-72.

SKEMA E KUPËS

Khadija Brown Haywood ka qenë lojtarja më e mirë e ndeshjes finale. Ajo ka shënuar 32 pikë për Bashkimin, ndërsa ka bërë edhe 7 asistime e 8 kërcime në fitore. Me 18 pikë, 5 asistime e 8 kërcime lojën e kreu Arbnore Përquku, ndërsa 16 të tjera i shënoi Aulona Muhadri, që bëri edhe 3 asistime e 15 kërcime në fitore.

Te Prishtina më të dalluara ishin Adrienne Godbold me 16 dhe Kaela Hilaire me 13 pikë të shënuara.

Fitorja, bën që Bashkimi të fitojë për të dytën herë radhazi Kupën në tri vitet e fundit, ndërsa në total prizrenaset kanë fituar për herë të shtatë trofeun.