TREPÇA - PRISHTINA
Derbi i javës i takon Prishtinës
3 February, 2018 @20:59
Përkundër faktit që Trepça zhvilloi një pjesë të dytë mjaft të mirë dhe e ngushtoi rezultatin deri në 3 pikë, takimi derbi i xhiros së XVIII u mbyll me fitoren e Prishtinës.
Epërsia e krijuar gjatë dy çerekëve të parë doli të ishte vendimtare për kampionin në fuqi të Kosovës, i cili edhe pse ra pak në lojë në pjesën e dytë, arriti ta menaxhonte epërsinë, për ta shënuar fitoren e 18 sezonale.
Duhet përmendur që palestra ‘Minatori’ edhe sonte ishte e stërmbushur, mirëpo tifozët vendas u detyruan të pajtohen me humbje, me ndeshjen që përfundoi 64-69.
Më të dalluarit te Trepça sonte ishin Samir Zekiqi me 22 pikë e 7 kërcime dhe Jordan Reed me 13 pikë, 10 kërcime e 1 asistim, derisa te Prishtina u veçuan Edmond Azemi me 25 pikë, 6 kërcime e 3 asistime dhe Fisnik Rugova me 19 pikë, 17 kërcime e 2 asistime.
Pas 18 xhirove, Prishtina vazhdon me bilanc perfekt, 18-0, derisa Trepça aktualisht ka bilanc 8-10.
