BASHKIMI - BOREA
E shtata për Bashkimin
13 December, 2018 @20:22
Bashkimi ka shënuar fitoren e shtatë të stinorit sonte duke e mposhtur Borean në Sezai Surroi bindshëm.
Basketbollistët e ekipit prizrenas, që është kampion aktual, kanë nisur të marrin veten pas startit të dobët dhe tashmë kanë shënuar edhe fitoren e dytë të stinorit me mbi 100 pikë të shënuara.
Fitorja e Bashkimit nuk u vë në pyetje sonte fare, pasi që pas vetëm 10 minutave ndeshje ata kishin epërsi të madhe, kur përfunduan çerekun e parë 31-9.
Ngritja e avantazhit vazhdoi çerek pas çereku për të arritur te rezultati përfundimtar 116-61.
Jordan Capps ka shënuar rekordin personal në Superligë të Kosovës duke dhënë 41 pikë në këtë fitore të ekipit të tij. Ndërsa 26 pikë tjera i ka dhënë Steven Haney.
Te Borea më të dalluarit kanë qenë Albin Berisha dhe Patrick Wrencher, me nga 23 pikë të shënuara secili.
Pas këtij dueli Bashkimi ka përmirësuar bilancin e përgjithshëm në 7-6, ndërsa Borea tash ka bilanc 3-10.
