Edhe një përforcim te Vëllaznimi

Vëllaznimi vazhdon me përforcime. Ekipi gjakovar që në fundjavë mposhti Yllin e Suharekës duke e regjistruar fitoren e parë të stinorit në Superligë, ka arritur marrëveshje me amerikanin, Larry Jackson. 

Jackson luan në pozitën 3 por mund të kryejë punë edhe në pozitën 4. Basketbollisti në fjalë është 201 centimetra i gjatë dhe ka bërë përvojë në Amerikën Jugore duke luajtur për Plazan në Uruguaj, derisa së fundi ka veshur fanellën e Duzi Royals në Afrikën Jugore, kanë njoftuar burime të Borozani.com. 

Ai do të jetë përforcimi i radhës për ekipin gjakovar, pas Dino Hodzic, Matteo Juricic dhe Marijo Hajdic - derisa do të bëhet amerikani i parë që do të luaj për ekipin gjakovar, këtë stinor. 

Në fakt Vëllaznimi kishte në ekip një amerikan para nisjes së stinorit, Ishmael Sanders, mirëpo ai u kthye disa ditë para nisjes së stinorit, pasi që nuk u pëlqye nga drejtuesit e klubit. 

Vëllaznimi pas dy disfatave në dy xhirot e para, ka arritur fitore në xhiron e tretë në Shani Nushi ndaj Yllit. Në xhiron e radhës, gjakovarët e udhëhequr nga Jeton Nixha, do të kërkojnë të vazhdojnë serinë e fitoreve në Ferizaj, ndaj Kastriotit që nuk ka fitore ende në Superligë.