Fitore e zorshme ndaj azerëve, për shpresa ndaj Zvicrës së kualifikuar!

Kosova ka shënuar fitore të vështirë sonte, por në fund ka arritur qëllimin! Përkundër se nuk shënoi fitore me rezultat më të thellë sesa humbja në Azerbajxhan, Kosova me 81-79 sonte ka dalë në vend të dytë të renditjes tabelare dhe ka lënë gjithçka për tu vendosur në ndeshjen e fundit të grupit.

“Dardanët” e drejtuar nga Jean-Denys Choulet bëjnë pjesë në Grupin A parakualifikues për Botërorin e vitit 2027 ndërsa me fitoren e sotme kanë dalë në vend të dytë, një xhiro pa përfunduar cikli i fazës grupore. Ndeshja e fundit e Kosovës në këtë grup luhet pas tre ditësh, kur “Pallatin e Rinisë dhe të Sporteve” e viziton Zvicra.

E Zvicra, me fitoren e sontme ndaj Irlandës veçse siguroi kualifikimin, pasi që ka bilanc 5-0 tashmë! Kosova është e dyta me 2-3, sa ka edhe Irlanda, ndërsa Azerbajxhani ra në 1-4. Kosovës për kualifikim i duhet fitorja patjetër ndaj helvetëve të dielën në Prishtinë!

Sa i përket përballjes me Azerbajxhanin, dallimi më i madh në rezultat për Kosovën ka qenë 9 pikë, ndërsa në dy minutat e fundit të përzgjedhurit e Choulet ndalën azerët në 1 pikë të vetme!

Më i miri te Kosova ka qenë Mikaile Tmusic, që dha 21 pikë, duke shutuar 5/9 për tre pikë, ndërsa bëri edhe 2 asistime e 4 kërcime në fitore.

Divine Myles luajti me 16 pikë, duke regjistruar 6 asistime e 5 kërcime, kurse 12 pikë i dha Dardan Kapiti e 10 të tjera Dardan Berisha.

Te mysafirët më efikasi ka qenë Donta Hall që dha 21 pikë dhe bëri 16 kërcime. Edhe Orhan Haciyeva sikurse Hall kreu lojën me double-double, duke shënuar 19 pikë e duke bërë 11 kërcime, por s’mjaftuan për fitoren e tyre.

TABELA AKTUALE E GRUPIT A:

1. Zvicra 5-0
2. Kosova 2-3
3. Irlanda 2-3
4. Azerbajxhani 1-4

Ndeshjet e fundit në grup: Kosova-Zvicra, Azerbajxhani-Irlanda.

Zvicra ka siguruar kalimin tutje, ndërsa nga vendet e dyta vetëm njëri shkon. Janë tre grupe parakualifikuese dhe aktualisht Kosovës fitorja me çfarëdo dallimi në pikë ndaj zviceranëve do t’i siguronte kalimin tutje! Të dielën prej orës 19:30, Kosova në “Pallatin e Rinisë dhe të Sporteve” në Prishtinë do të duhet të bëj çmos, për të arritur triumfin dhe biletën për kualifikim tutje.