Irving vendos, kampioni triumfon

Kyrie Irving ka shënuar dy pikësh në sekondat e fundit të ndeshjes për t’ia dhënë epërsinë 109-108 kampionit Cleveland Cavaliers dhe për t’ia sjellë fitoren ekipit të tij ndaj Golden State Warriorsit në një ndeshje të çmendur, në reprizën e finales së stinorit të kaluar në NBA.

Golden State Warriors kishte epërsinë në pjesën më të madhe të ndeshjes, ndërsa në çerekun e fundit përmes Kevin Durantit, shkoi deri në 14 pikë epërsi.

Sidoqoftë, përmes pikëve të Iman Shumpertit, Cleveland nisi të ulë epërsinë dhe disa minuta para fundit ndeshja ra në baraspeshë, për të vendosur Irving në fund.

Irving mbylli takimin me 25 pikë e 10 kërcime, ndërsa Lebron James shënoi 31 pikë e 13 kërcime në fitore, që faqja zyrtare e Cavs e quajti, Urime Kërshëndellat dhe pushime të lumtura.

Durant e përfundoi takimin me 36 pikë kolosale dhe 15 kërcime, që shkuan vetëm për statistika në fund. Klay Thompson shënoi 24 pikë, ndërsa Draymond Green 16, e Steph Curry u ndal në 15 pikë te finalisti i NBA-së.

Dueli i liderëve të Konferencave dhe rivalëve të ashpër të kohës, tashmë pas kësaj ndeshjeje ka bilanc 22-6 për Cavsin ndërsa 27-4 për Warriorsin në klasifikim të përgjithshëm.