Kosova U20 grumbullohet për Eurobasket

Përfaqësuesja e Kosovës nën 20 vjeç ka filluar përgatitjet për Kampionatin Europian të Divizionit B.

Nën udhëheqjen e përzgjedhësit Jeton Nixha, i cili është njëkohësisht edhe kryetrajner i skuadrës së Rahovecit, ka realizuar grumbullimin e parë me lojtarët potencialë që do ta përfaqësojnë vendin tonë.

“Ky është grumbullimi i parë, më shumë informativ sa i përket nesh, që të kemi një qasje më të mirë sa i përket kualitetit që kemi në dispozicion dhe shpresoj që me grumbullimet e tjera që do t’i kemi në të ardhmen do të jemi edhe më afër përgatitjeve të cilat do t’i kemi, që janë kyçe për korrikun e vitit 2017,” tha Nixha për KTV-në.

Përveç basketbollistëve që luajnë në Kosovë, në këtë grumbullim janë ftuar edhe shtatë basketbollistë që luajnë jashtë Kosovës.

Kampionati i Eurobasketit i Divizionit B për U20 do të mbahet në Oradea të Rumanisë prej 14 deri më 23 korrik të këtij viti, ndërsa Kosova është në një grup së bashku me Irlandën, Hungarinë, Kroacinë, Portugalinë dhe Moldavinë.