Mbyllja e Rios historike për Kosovën

Dhe pas më shumë se dy javëve, është koha për të lëshuar perden olimpiadës së Rios. Për neve, kjo mbetet olimpiada më e mirë deri më tani. Për neve, shpresoj të jetë vetëm e para në mesin e shumë olimpiadave të suksesshme. Tashti na pret puna, jo veç sportistët, por të gjithëve neve që duhet ti përkrahim në çfarëdo mënyrë të mundshme, qoftë edhe vetëm me fjalë.

SHBA-të fituan basketbollin, Kina volejbollin, Rusia hendbollin në finalet e femrave. Tek meshkujt, Brazili më në fund mori të artën olimpike. Mo Farah po mbetet në hije të Usain Bolt përkundër sukseseve që po ka.

Sot mbaron boksi me katër finale që nisin në ora 19:00. Gjysmë ore më herët nisin dy finalet e fundit ë mundjes. Finalja e parë e ditës është maratona në ora 14:30. Gjimnastika ritmike ekipore finalen e ka në ora 16, derisa çiklizmi malor për meshkuj nis në ora 17:30.

Finalet e fundit në sportet ekipore janë në volejboll ku italianët provojnë të artën e parë në histori kundër Brazilit që ka fituar tre herë (18:15); në hendboll ku Franca tenton titullin e tretë radhazi kundër Danimarkës që s’ka fituar asnjëherë (19:00); dhe në basketboll ku SHBA-të provojnë titullin e 15të kundër Serbisë që nuk ka asnjë medalje (20:45).

E numri i radhës i ditarit olimpik vjen më 10 shkurt 2018.