BARCELONA - CSKA
Mungon Doellman, Barca mposhtet nga kampioni
3 March, 2017 @23:36
Me rezultat 61-85 është mbyllur takimi mes Barcelonës dhe CSKA Moskës i zhvilluar sonte në kuadër të Euroleagues.
Një super çerek i parë, në të cilin kampioni në fuqi i kësaj gare e deklasoi në çdo aspekt Barcelonën, duke shënuar plot 29 pikë dhe duke pranuar vetëm 4, bëri që ndeshja të shkonte në kahun rus që nga fillimi, e më pas menaxhimi i ndeshjes për rusët ishte tejet i lehtë dhe fitorja erdhi.
Përkundër përpjekjeve të katalunasve në vazhdim, gjithçka ishte e kotë, me dyshen Teodosic - De Colo që e drejtuan skuadrën e tyre drejt fitores së radhës. Te vendasit, më i dalluari ishte Vezenikov me 14 pikë.
Duhet përmendur që për Barcelonën në këtë takim nuk ishte i pranishëm Justin Doellman, anëtari i Përfaqësueses së Kosovës.
Sa i përket renditjes, kjo fitore bën që CSKA të jetë në vendin e dytë, me bilanc të njëjtë si të Real Madridit lider, kurse Barcelona ndodhet në vendin e 11 momentalisht.
