NCAA Showcase – kamp i nivelit të lartë

NCAA Showcase Kosovo 2017 – kampi i parë i akredituar nga NCAA që zhvillohet në Prishtinë javën e ardhshme do të shënojë fillimin e një epoke të re për basketbollin e Kosovës, sa i përket ngjarjeve të këtilla.

Organizatorët e kampit kanë dhënë disa prej detajeve që këtë kamp e bëjnë të veçantë dhe pse të gjithë të interesuarit për bursa në kolegjet amerikane ose për prova në ekipe në Evropë duhet të lajmërohen në kamp.

“Të gjithë basketbollistët do të kenë shansin e barabartë, që do të thotë minutazhin e barabartë në fushë dhe numrin e njëjtë të ndeshjeve. Ekipet do të përbëhen nga 10 lojtarë dhe secili prej tyre do të kalojë 20 minuta në fushë në një ndeshje, sipas formulës së NCAA për kampe të këtilla.
Po ashtu të gjithë pjesëmarrësit pas përfundimit të kampit do të marrin raportet e skautimit dhe video inçizimet (highlights) të bëra në mënyrë profesionale nga skautë amerikanë”.

Leart Hoxha një prej organizatorëve ka bërë të ditur edhe detaje tjera që këtë kamp e bëjnë të veçantë.

“NCAA kërkon që të gjithë pjesëmarrësit në kampet e akredituara të kenë sigurim shëndetësor dhe ne kemi arritur që këtë ta sigurojmë për basketbollistët nga Kosova dhe shtetet e rajonit që marrin pjesë në kamp, kurse jemi duke bërë përpjekje që kë kemi edhe live transmetime të kampit për trajnerë amerikanë që kanë interes dhe nuk mund të vijnë në Kosovë për shkak të obligimeve”.

Bursat sportive të kolegjeve amerikane që kanë ekipe në NCAA kushtojnë zakonisht dhjetëra mijëra dollarë, kurse basketbollistët nga Kosova, Shqipëria, Maqedonia dhe Mali i Zi mund ti fitojnë ato në showcase kampin që mbahet në Prishtinë, më 22 dhe 23 prill. Lajmërimet e lojtarëve pjesëmarrës bëhen në ueb faqen www.basketball-ks.com.