Parashikimi për Tour de France ‘19

Me lëndimin e Chris Froome, lufta për titullin e kampionit të garës më të madhe në çiklizëm është hapur në tërësi. Kampioni i katërfishtë do të mungoj për shkak të lëndimit gjatë stërvitjeve për TdF, dhe ndoshta është me fat që do të mund të kthehet në këtë sport pas raporteve fillestare në lidhje me lëndimin e tij.

Megjithatë, Team Ineos (ish Team Sky) mbetet favoriti kryesor për titullin e pestë radhazi në Francë. Kampioni aktual, Geraint Thomas do të jetë lider i ekipit anglez, por të gjithë presim që Egan Bernal të jetë kandidat më i madh për titull pas fitores së vitit të kaluar për çiklistët e rinj. Që të dy janë të përkrahur nga një ekip që në vete ka Moscon, Poels, e Kwiatkowskin për t’i ngjitur në majat e Alpeve dhe Pirenejve.

Gjasat që titulli të përfundojë në Kolumbi i shton edhe Nairo Quintana. Tri podiume para pozitës së dhjetë vitin e kaluar dhe mungesa e Froome nxisin kolumbiani të tentojë titullin me Movistar. Ekipi spanjoll ka përbërje shumë të mirë, por njashtu edhe liderë kokëfortë në Mikel Landa. Spanjolli i cili me gjasë do të largohet nga ekipi në fund të sezonit, është bashkë-lider dhe së bashku me Quintanan do të luftojnë për primatin në ekip duke llogaritur në ndihmën e Valverdes, Amadorit, e Marc Soler.

Gjersa Nibali do të ketë të vështirë të përsërit suksesin e vitit 2014, italiani do të vjen me një lodhje shtesë pas Giros ku nuk ia doli të fitojë karshi Carapazit të Movistar. Lodhja do të jetë evidente edhe tek vëllezërit Yates, gjersa Uran, Bardet, e Pinot do të mund të preken nga pasiviteti i tepruar në gjashtë muajt e parë të sezonit.

Favoriti kryesor për mendimin tim do të duhej të ishte Jakub Fuglsang. Pos që Astana ka pasur një super-sezon në pjesën e parë të vitit, Fugslang personalisht po kalon ndoshta sezonin më të mirë të karrierës. Triumfi në Criterium du Dauphine, dhe në Liege-Bastogne-Liege dëshmon më së miri për pranverën fantastike të danezit, i cili ka podiume edhe në Strade Bianche, në dy klasike të Ardenneve, dhe në Tirreno-Adriatico. Në ekip ka përkrahjen e Bilbaos, LL Sanchezit, Frailet, e Houle.

Befasitë mund të vijnë nga dy çiklistët e BORA-hansgrohe, Konrad e Buchmann, dhe eventualisht irlandezit Dan Martin i cili nuk ia huq Top10shes në tri sezonet e fundit, e vitin e kaluar edhe siguroi etapën e dytë në karrierë.

Kategoritë tjera

Sprinterët, ngjitësit, e të rinjtë do të kenë nën-betejat e tyre gjithashtu. Por, pritet që Bernal të fitoj edhe renditjen e përgjithshme edhe atë së të rinjve, ngjashëm si Bardet i cili me gjasë do të koncentrohet në etapat malore dhe fanellën me pika vjollce për Mbretin e Maleve.

Peter Sagan kërkon titullin e shtatë të sprinterit më të mirë dhe të thyej rekordin personal prej tri fitoreve në një Tour. Deri tani ka 11 që është larg 26 të Mark Cavendish, i cili ishte edhe arsye pse nuk do të mund të llogariste në titullin e tetë radhazi pas diskualifikimit para dy viteve. Titulli për sllovakun do të thoshte edhe histori e TdF me personin e parë që fiton shtatë herë titullin e më të shpejtit.

Dylan Groenewegen e Elia Viviani janë rivalët e zakonshëm, bashkë me fituesin e para dy viteve, Michael Matthews. Por, të gjithë mezi presim debutimin e Caleb Ewan në Tour de France.

Titulli i ngjitësit më të mirë, Mbretit të Maleve, me shumë gjasë do t’i takojë dikujt prej francezëve. Julian Alaphilippe dhe Warren Barguil janë favoritët kryesorë, me Thibaut Pinot e David Gaudu, si favoritë dytësorë me Bardet.

Tek të rinjtë, titulli pritet t’i takojë Bernalit, pos nëse nuk arrin të përfundojë garën.

Shtegu

Edicioni i 106të i Tour de France nis në Bruksel me etapën e parë të rrafshët, për të vazhduar me kronometrin prej 27.6km, po ashtu në kryeqendrën belge. Etapa e parë malore na presin në mes-javë para se të kalojmë në Masivin Qendror dhe drejt Pirenejve, në fund të javës së dytë të garave me kronometrin në Pau, ndërmjet dy etapave malore të cilat do të ndajnë ‘shapin nga sheqeri!’.

Pas të hënës së lirë në javën e fundit, dy etapa na përgatisin për Alpet ku do të mësojmë edhe fituesin e garës më të madhe në çiklizëm, para se të kalojmë në parakalimin në Champs-Elysees të dielën e 28 korrikut!

Ndoshta, për herë të parë në shumë vite, do të shohim një TdF që nuk dominohet nga Real Madridi i çiklizmit, Team Ineos! Parakushtet janë aty, por gjithçka mund të ndryshojë shumë shpejtë e lehtë në çiklizëm, gjë që e bën edhe njërin ndër sportet më interesante, por fatkeqësisht të nënçmuara!