Pau Gasol paralajmëron rikthimin e madh

Pas një pritjeje të gjatë, qendra veterane spanjolle, Pau Gasol, që bëri kalim të bujshëm te Barcelona ka bërë të ditur se do të paraqitet nesër për Barcelonën. Borozani.com

Ai do të veshë fanellën me numër 16 për herë të parë pas 20 vitesh dhe atë në duel ndaj Bayernit në kuadër të Euroligës, PlayOffi i së cilës fillon më 20 prill.

“Pau është duke u ndjerë mirë. Ai po e ngrit ritmin dhe në secilën stërvitje po bëhet më i mirë,” ka thënë trajneri i ekipit katalonas, Sarunas Jasikevicius.

Përndryshe, kjo është xhiroja e fundit e stinorit të rregullt të Euroligës, ndërsa Barcelona ka nevojë për fitore për të dalë pastër e para në renditje, edhe pse është lidere e stinorit të rregullt me bilanc 24-9, ndërsa ndjekësi i parë CSKA Moska është me 23-10.

Gasol për dy vjet gati nuk ka luajtur basketboll për shkak të një lëndimi. Ndeshja e fundit e tij ka qenë më 12 mars 2019 për Milwaukeen ndaj New Orleansit.

Qendra 40-vjeçare ka fituar dy herë titullin në NBA me Los Angeles Lakers, titullin e kampionit të Botës me Spanjën në 2006, tre evropianë me Spanjën dhe medalje Olimpike nga Pekini 2008, Londra 2012 dhe Rio 2016.