Peja-Prishtina, mund të takohen vetëm në finale

Federata e Basketbollit e Kosovës (FBK) ka bërë të ditur ditë më parë se ndeshjet e Kupës së Kosovës në basketboll do të zhvillohen nga 15 deri më 19 shkurt të vitit të ardhshëm, 2023.

Sipas grupeve të ndara, tashmë dihet edhe rrugëtimi i skuadrave drejt trofeut të Kupës, ndërsa dyshja rivale Peja e Prishtina do të mund të takohen vetëm në finale të garës. Njëjtë sikurse edhe Trepça-Prishtina, që luajtën finalen e Superkupës në fillim të këtij muaji, që kaloi me plot incidente dhe me fitoren e bardhekaltërve në fund.

Pikërisht, sherri i bërë në Superkupë ka ndikuar që ndeshjet e turneut të Kupës së Kosovës të luhen pa shikues. Kjo, pasi që FBK në mbledhjen e Bordit të saj pas finales, kishte marrë këtë vendim të “dhimbshëm”.

Sa i përket Final 8 të Kupës së Kosovës, duelet e para janë:

ÇEREKFINALET:

A: Peja-Rahoveci
B: Prishtina-Bashkimi
C: Ylli-Prizreni
D: Trepça-Vëllaznimi

GJYSMËFINALET:

1. fituesi A - fituesi D
2. fituesi B - fituesi C

FINALJA:

fituesi 1 - fituesi 2.

Dueli final është paraparë të luhet më 19 shkurt 2023, të dielën.