Prishtina rikthehet në fund për të mposhtur Rahovecin

Pas disavantazhit për kohë të gjatë që kishte, 3 minuta e 46 sekonda para fundit të ndeshjes me treshen e Edmond Kryeziut, Rahoveci barazon rezultatin ndaj Prishtinës 75-75, ndërsa më pas me pikët e Fisnik Rugovës dhe përsëri të Kryeziut merr avantazhin 4 pikësh, 79-75.

Kishin mbetur edhe dy minuta lojë, ndërsa bardhekaltërit rekord-kampionë të Kosovës nisën rikthimin. Treshi i Muhamedali Janjevës uli epërsinë ndërsa në 2 minutat e fundit Rahoveci më s’shënoi asnjë pikë, e Prishtina fitoi duelin me përfundimtaren 79-85 [19-27, 20-22, 21-19, 19-17].

Janjeva kreu ndeshjen me 9 pikë, 4 asistime e 3 kërcime, në 22 minuta sa ishte në parket, derisa Jan Palokaj ishte më efikasi me 19 pikë të shënuara e 6 kërcime. Numër të njëjtë të kërcimeve dhe një pikë më pak se Palokaj dha Wendell Mitchell, ndërsa Prishtina mori fitoren e 13 sezonale për të barazuar bilancin në 13-13, dy xhiro para fundit të stinorit.

TABELA AKTUALE

Fitorja do të thoshte shumë për Rahovecin dhe ndoshta do të mund të siguronin PlayOffin me një të tillë, por se cka ndodhi në 2 minutat e fundit të lojës, ishte krejt në favor të mysafirëve në parket.

Makol Mawien kreu lojën me double-double, duke shënuar 25 pikë e 12 kërcime, ndërsa 10 pikë shënoi edhe TJ Dunans, bashkë me 7 asistime, që s’mjaftuan për më shumë. Fisnik Rugova përkundër formës së mirë, gjithashtu nuk mjaftoi për fitore ndaj ish-ekipit të tij. Ai kreu lojën me 18 pikë e 9 kërcime, ndërsa Rahoveci do të tentojë fitoren në dy ndeshjet e mbetura për të siguruar PlayOffin, ndaj Ylli në xhiron tjetër si vendas, ose ndaj Trepçës në xhiron e fundit si mysafir.

Prishtina e Ante Nazorit, duket se ka vulosur pozitën e pestë në renditje dhe Prizreni’16 pritet të jetë rivali i tyre i çerekfinales së PlayOffit.