TOP 5-shja e javës në Superligë (IV)

Pas ndeshjeve të përfunduara të xhiros së katërt në Superligën e Kosovës në basketboll, TopSporti.com ka përzgjedhur pesëshen e javës bazuar në performancat individuale të lojtarëve.

Në pesëshen e zgjedhur nuk ka lojtarë nga ndeshjet Peja - Bashkimi dhe Prishtina - Ylli, pasi që këto ndeshje do të luhen më vonë.

Ekipin e javës e përbëjnë: Kalin Fisher (Trepça), Arti Hajdari (Prizreni), Tobi Ewuosho (Trepça), Cedric Council (Vëllaznimi) dhe Josh Martin (Prizreni).

Trepça e mposhti Vëllaznimin me rezultat 76-80 dhe e regjistroi fitoren e dytë të sezonit.

Më të mirët ishin Kalin Fisher dhe Tobi Ewuosho. Fisher luajti me 19 pikë, 4 kërcime e 4 asistime, kurse Ewuosho me 26 pikë, 8 kërcime, 4 asistime e 4 topa të rrëmbyer.

Prizreni pas vazhdimeve e mposhti Rahovecin me rezultat 77-82.

Rolin kryesor në fitoren e Prizrenit luajtën Arti Hajdari dhe Josh Martin. Hajdari shkëlqeu me 20 pikë, 7 asistime, 6 kërcime e 3 topa të rrëmbyer, kurse Martin me double-double prej 12 pikëve e 25 kërcimeve.

Në pesëshen e javës gjeti vend edhe amerikani i Vëllaznimit Cedric Council. Ai në humbjen e skuadrës ndaj Trepçës luajti me 27 pikë, 8 kërcime, 1 asistim, 1 bllokadë dhe 1 top të rrëmbyer.