FINAL 8: TREPÇA - RAHOVECI
Foto: FBK
Trepça gjysmëfinaliste e parë, pa telashe kundër Rahovecit
9 February, 2022 @18:53
Skuadra mitrovicase, Trepça, duke e mposhtur Rahovecin me rezultat 77-57, bëhet gjysmëfinalisti i parë në Kupën e Kosovës.
Starti 10-4 në të mirë të Trepçës dhe 7 pikët e para të shënuara nga Drilon Hajrizi dhanë sinjalin fillestar.
Mitrovicasit ishin të disponuar për lojë karshi Rahovecit dhe ndeshja vazhdoi në këtë ritëm, ashtu që minatorët shkuan lehtë drejt fitores në Final 8 për të siguruar gjysmëfinalen duke e mposhtur Rahovecin me 20 pikë dallim në fund.
Në çerekun e parë epërsia ishte 6 pikë për Trepçën, derisa pas çdo çereku u ngrit epërsia, kurse vreshtarët në asnjë moment nuk arrinin t’i kapnin minatorët.
Drilon Hajrizi ishte më i miri te Trepça me 17 pikë, kurse me pikë dyshifrore luajtën edhe Amin Hot 14 pikë dhe Ty Cockfield me 12 pikë dhe Samir Zekiqi me 11 pikë të tjera.
Te Rahoveci u dalluan TJ Dunans me 14 pikë, Milik Yarbrough me 11 pikë dhe Ameer Jackson e Fisnik Rugova me nga 10 pikë secili.
Trepça në gjysmëfinale do të takohet me fituesin nga dueli Peja - Prishtina.
