26 minuta për Maxhunin, Long Beach State i rikthehet fitoreve

Pas 2 humbjeve radhazi, skuadra e Long Beach State i është rikthyer fitoreve në ndeshjen ndaj skuadrës Cal Poly.

Pjesa e parë kaloi me shumë pak pikë të shënuara dhe u mbyll me rezultatin 19-17, rezultat ky që dëshmon faktin që të dyja skuadrat gjuajtën me përqindje tepër të dobët nga loja, ndërsa përmirësimet u panë dukshëm në pjesën e dytë dhe dueli u mbyll me rezultatin përfundimtar 73-54 në të mirë të skuadrës së Edon Maxhunit.

Edoni, si zakonisht, edhe në këtë duel ishte në pesëshen startuese të skuadrës së tij. Ai në këtë takim ishte i saktë 1 herë nga 8 tentimet e tij nga loja, si dhe shënoi 2 gjuajtje të lira, për të realizuar në total 4 pikë, ndërsa shtoi edhe 4 kërcime, 3 asistime dhe 1 top të vjedhur për 26 minuta lojë. Ajo që ra në sy në këtë përballje ishte mbrojtja e Edonit, e cila në këtë duel ishte dukshëm më e mirë sesa në duelet e mëparshme.

Ndeshjen e ardhshme skuadra e Edonit e luan të premten në mëngjes ndaj skuadrës Santa Barbara, lideres së Big West Conference. Momentalisht, edhe Long Beach State, që është në vendin e tretë, edhe Santa Barbara, kanë pikë të barabarta, dhe ndeshja e së premtes pritet të jetë mjaft interesante.