Alban Veseli i kthehet parketit!

Njëri ndër basketbollistët më me përvojë të Superligës, Alban Veseli, pritet t’i kthehet basketbollit shpejt, ndërsa FBK ka bërë të ditur se vendimi për rikthimin e tij dhe regjistrimin si lojtar është marrë sot pas shqyrtimit të kërkesës nga Bordi i FBK-së.

Basketbollistit 31-vjeçar i është miratuar kërkesa për regjistrim këtë edicion garues dhe ajo do të jetë e vlefshme prej datës 15 nëntor, ka bërë të ditur FBK-ja.

“Bordi i Federatës së Basketbollit të Kosovës (FBK) në mbledhjen e mbajtur më 01.11.2021 në Prishtinë ka shqyrtuar situatën aktuale në basketbollin kosovar dhe, ndër të tjera, ka vendosur si në vijim: 3. E ka miratuar kërkesën e përfaqësuesit të Kosovës, Alban Veseli për regjistrim të parë në këtë edicion garues. Regjistrimi do të jetë i vlefshëm nga data 15 Nëntor 2021.” — është thënë në njoftim.

Kujtojmë, Alban Veseli ka qenë pjesë e disa ekipeve kosovare duke nisur nga Prishtina e duke qenë pjesë e Yllit, Pejës e Rahovecit në proces.