Bashkimi fiton, me dominimin e Sinanit dhe Lockes

Bashkimi ka shënuar fitore në ndeshjen e parë të serisë gjysmëfinale të Play-Offit ndaj Pejës.

Me këtë, Bashkimi ka marrë epërsinë 1-0 në seri ndaj Pejës. Bashkimi mposhti Pejën sonte në Sezai Surroi të Prizrenit me rezultat 116-87.

ÇEREKËT

Portokallezinjtë nisën mirë ndeshjen dhe shënuan mbi 30 pikë në çerekun e parë të lojës.

Pastaj në çerekun e dytë, Peja u këndell, duke e ngushtuar epërsinë në 3 pikë, ku pjesa e parë përfundoi me rezultat 50-47.

SKEMA E PLAYOFFIT TË SUPERLIGËS

Sidoqoftë, Bashkimi i vetëdijshëm se Peja nuk ka qendër klasike, shfrytëzoi maksimalisht Gazmend Sinanin dhe në ndihmë të tij edhe Kayel Locken për të rimarrë epërsinë në ndeshje ku në çerekun e tretë riktheu epërsinë e lartë, 82-63 dhe e vazhdoi deri në fund, 116-87.

Dallimi në ndeshje u pa qartë te pozita e qendrës, ndërsa Sinani e Locke bashkë bënë double-double, duke shfrytëzuar kërcimet. Dyshja në fjalë mblodhi më shumë topa nën kosh sesa tërë ekipi i Pejës, që udhëtoi në Prizren me vetëm 8 lojtarë në përbërje shkaku i krizës financiare.

PERFORMANCAT

Më efikasi te Bashkimi ka qenë Justin Black me 33 pikë të shënuara sonte. Ai ka bërë edhe 8 asistime në këtë fitore.

Kayel Locke ka luajtur me 20 pikë, 11 kërcime e 3 asistime. Ndërsa Gazmend Sinani ka dhënë 18 pikë, 20 kërcime, 2 asistime dhe 2 bllokada.

Te Peja, slloveni Robert Abramovic ka shënuar 25 pikë në ndeshjen që s’pushoi fare. 19 pikë të tjera shtoi Arti Hajdari, ndërsa nga 15 dhanë Leonard Mekaj e Arian Qallaku.

Seria tash vazhdon në Karagaç të Pejës, ku do të zhvillohen dy ndeshjet e radhës. Ekipi që arrin tre fitore së pari, kualifikohet në finale të Play-Offit. Në rast se nuk zgjidhet fituesi pas dy ndeshjeve të radhës, atëherë seria në dy ndeshjet e fundit (të katërtën dhe të pestën) bartet në Sezai Surroi.

Bashkimi

Peja