SHQIP NË BOTË
Edon Maxhuni me pikë dyshifrore në humbjen e Long Beach State
18 January, 2018 @11:58
Pas fitores ndaj UC Riverside University në fundjavë, Long Beach State i Edon Maxhunit është mposhtur në mëngjesin e sotëm nga skuadra e UC Davis, skuadër kjo që vitin e kaluar u shpall kampione e ‘Big West Conference’.
Maxhuni, që është në vitin e tij të parë në kolegjin amerikan, ishte përsëri startues për skuadrën e tij dhe luajti për 24 minuta, në të cilat ai pati 10 pikë, 4 asistime, 2 topa të vjedhur dhe 1 kërcim. Në 10 pikët e shënuara, Edoni ishte i saktë 2 herë nga 2 tentimet për 3 pikë dhe 2 herë të tjera nga 4 tentimet për 2 pikë.
Sa i përket ndeshjes, ajo ishte e barabartë deri në minutat e fundit, mirëpo skuadra e UC Davis u tregua më me përvojë dhe shfrytëzoi maksimalisht gabimet personale të lojtarëve të Long Beach State, duke u treguar e saktë sidomos në gjuajtjet e lira në pjesën e dytë dhe takimin e mbylli me fitore 84-75.
Ndeshjen e ardhshme skuadra ku aktivizohet organizatori kosovar me nënshtetësi finlandeze e luan ndaj skuadrës Cal State Fullerton të dielën në mëngjes.
