Fitore në shtëpi, Prishtina 1 hap larg titullit

Me fitoren e Prishtinës është mbyllur takimi i tretë i serisë finale mes Prishtinës e Bashkimit, duke bërë kështu që kryeqytetasit të kenë epërsi 2-1 pas 3 ndeshjeve të luajtura dhe të jenë vetëm 1 fitore larg titullit kampion. Borozani.com

Çereku i parë i ndeshjes ishte kryesisht i barabartë. Mysafirët nga Prizreni të udhëhequr nga Soyebo patën 3 trepikësha në këtë çerek, ndërsa në anën tjetër te Prishtina shihej një mungesë e koncentrimit në sulm, gjë që rezultonte në marrjen e vendimeve të gabuara dhe ky çereku u mbyll me epërsi të lehtë të prizrenasve.

Rikthimi i vendasve filloi nga çereku i dytë. Prishtina e nisi këtë çerek me 2 treshe radhazi, ndërsa më pas ishte Fisnik Rugova ai që zhvilloi lojë shumë të mirë nën trapez, duke iu shkaktuar probleme të shumta prizrenasve, të cilëve iu ra dukshëm efikasiteti nga loja, përkundër numrit të madh të topave të kapur në fazën e sulmit.

SKEMA PLAY OFF

E pjesa e dytë ishte e tëra e Prishtinës, skuadër kjo që edhe sonte ishte pa Drilon Hajrizin. Me të filluar çereku i tretë, Prishtina e tregoi forcën, me Jabarie Hindsin që u zgjua nga gjumi në këtë çerek. I vetmi problem i Prishtinës ishte numri i madh i gabimeve personale dhe hyrja shumë e shpejt në bonus, mirëpo kjo gjë nuk u shfrytëzua aspak nga Bashkimi, skuadër kjo që zhvilloi një paraqitje të dobët sa i përket gjuajtjeve si nga loja ashtu edhe nga gjuajtjet e lira në këtë çerek. Kjo bëri që Prishtina ta mbyllte çerekun e tretë me plot 11 pikë epërsi, 56-45.

Në 10 minutëshin e fundit, Prishtina nuk lëshoi terren dhe e vazhdoi lojën e mirë, për ta mbyllur kështu me fitore bindëse takimin. Gjithashtu, në këtë takim Bashkimi e humbi edhe lojtarin Mikaile Tmusic, i cili u detyrua të largohet për shkak të lëndimit.

Një fakt interesant nga ndeshja është që pika e parë e Bashkimit nga gjuajtjet e lira erdhi 3 minuta para fundit të takimit, një fakt tjetër që e dëshmon pasaktësinë e prizrenasve nga ky aspekt i lojës, gjë që ndodhi edhe në takimin e dytë të serisë në Prizren.

Më të dalluarit te Prishtina sonte ishin Moser, Hinds, Delic e Rugova, të gjithë me pikë dyshifrore, derisa te Bashkimi u veçuan të zakonshmit Kayel Locke me 22 pikë, 7 kërcime e 1 asistim dhe Justin Black me 13 pikë, 5 kërcime e 2 asistime.

Ndeshja e radhës zhvillohet të mërkurën në Prizren, takim i cili mund të jetë i fundit i serisë, pasi që nëse Prishtina fiton, shpallet kampione e Kosovës.

Sigal Prishtina

Bashkimi