Green 30 pikë, Ylli fiton ndeshjen dramatike ndaj Bashkimit

Pas Pejës, Ylli ka mposhtur edhe Bashkimin për t’iu afruar edhe më vendit të dytë të renditjes tabelare, që aktualisht e zë ende Bashkimi! Në një ndeshje mjaft të ngushtë, Ylli ka arritur që në çerek të fundit të shkrijë epërsinë e Bashkimit dhe ta fitojë ndeshjen në fund, derisa Quade Green ka shënuar 30 pikë në fitoren 69-72. Me tu kryer ndeshja, disa tifozë kanë zbritur në parket, derisa lojtarët e Yllit janë larguar shpejt drejt zhveshtoreve! Aty ndërhynë edhe forcat e sigurisë.

Green ka shutuar 3/5 për tre pikë, ndërsa ka bërë edhe 2 asistime e 2 kërcime në përballjen e sontme, që për Bashkimin ishte humbja e dytë me radhë, pas asaj befasuese ndaj Borës në kampionat! Jalen Nesbitt shënoi 15 pikë, ndërsa Hasahn French dha 7 pikë, bëri 3 asitime e 10 kërcime në fitoren e suharekasve të drejtuar nga Endrit Elshani.

TABELA AKTUALE

Te Bashkimi, që topin e fundit me mundësi për të barazuar duelin e humbi Lejson Zeqiri dhe ndeshja përfundoi me fitoren e Yllit, më së shumti pikë dha Mack Smith, 16, derisa Lejsoni e kreu lojën me 15 pikë, 2 asistime e 8 kërcime.

Bashkimi mbetet i dyti edhe këtë xhiro, ndërsa pas 12 ndeshjesh ka bilanc 8-4. Ylli i treti, tash është me bilanc 7-5.