Nicola Adams mbron titullin

Boksieria britanike Nicola Adams ka mbrojtur titullin e fituar në Londër në kategorinë flutur, deri në 51kg.
Ajo këtë sukses e arriti pas fitores unanime ndaj francezes Sarah Ourahmoune. Adams këtë vit ka fituar edhe titullin e kampiones të botës në Astana, ku Ourahmoune kishte qenë e bronztë.

Të bronztat në Rio u takuan Ren Cancan nga Kina dhe Ingrit Valencia nga Kolumbia.

Tek meshkujt në program ishin dy finale.

Në kategorinë bantam, deri 56kg, kubanezi Robeisy Ramirez mori të artën e dytë olimpike në karrierë. Ai pasi kishe fituar kategorinë flutur në Londër, në Rio në finale mposhti amerikanin Shakur Stevenson. Vladimir Nikitin nga Rusia dhe Murodjon Akhmadaliev nga Uzbekistani morën të bronztat.

Kategoria e fundit e ditës ishte ajo e mesme, deri në 75kg. Edhe këtu e arta i takoi Kubës me fitoren e Arlen Lopez ndaj Bektemir Melikuziev nga Uzbekistani. Kamran Shakhsuvarly nga Azerbajxhani dhe Misael Rodriguez nga Meksika morën medaljet e bronzta.