Prizreni rikthen Ivan Koljevicin në ekip

Basketbollisti i njohur malazez, që tashmë tre stinorë po militon në Superligë të Kosovës dhe asnjëherë aty ku e nis nuk e përfundon stinorin, Ivan Koljevic, është rikthyer te KB Prizreni.

Skuadra në fjalë, që në stinorin e kaluar kishte trajner Edin Kërveshin dhe shpëtoi përmes ndeshjeve për playout nga rënia, ka bërë të ditur se ka arritur marrëveshje me 39-vjeçarin nga Cetinja, që në stinorin e kaluar ka pasur mesatare prej 38 minutash lojë te Ponte Prizreni, 14.3 pikë për ndeshje, 6.7 asistime dhe 5.4 kërcime.

Koljevic është lojtari i dytë i zyrtarizuar te Prizreni për stinorin 2023/24 pas Ryan Hughesit, të cilin klubi e bëri të ditur javë më parë. Koljevic në stinorin e kaluar pas ndarjes me Prizrenin luajti 4 ndeshje për Pejën dhe u nda me ekipin para fundit të stinorit. Në Superligë ai ka luajtur edhe për Trepçën e Rahovecin më parë.◼️