Reynolds regjistrohet si lojtar i ri i Trepçës

Basketbollisti amerikan Zach Reynolds është lojtari i radhës që këtë stinor do të vesh fanellën e Trepçës nga Mitrovica.

Federata e Basketbollit të Kosovës në një njoftim të saj ka bërë të ditur se Trepça ka paraqitur për regjistrim amerikanin që së fundit ka qenë pjesë e ekipit ekuadorian Portoviejo.

Reynolds do të ketë të drejtë të paraqitet për Trepçën, posa ekipi të kompletojë dokumentacionin dhe të paguajë shumën e nevojshme për regjistrim të të huajve në FBK.

Përndryshe Reynolds është lojtar i pozitës 4-5, që pritet të zëvendësojë Harold Ridgewayin (amerikanin e deritashëm te Trepça). Reynolds 206 centimetra i gjatë dhe 110 kilogramë i rëndë, ka pasur mesatare prej 11.9 pikëve, 11.9 kërcimeve 1.3 asistimeve dhe 41% saktësi për tre pikë në vitin e fundit.

Trepça, tetë xhiro para fundit të stinorit të rregullt është në pozitën e gjashtë të klasifikimit me bilans 9-11. Mitrovicasit sot do të jenë mysafirë të Bashkimit në Prizren në kuadër të xhiros së XXI të Superligës.