Shahistët e KSH Prizreni, marrin vendin e dytë në turne ndëkombëtar!

Prej se pandemia coronavirus kaploi botën, turnetë e shahut kaluan në platformat e ndryshme online dhe kështu shahistët kosovarë iu bashkuan garave të shumta që po mbaheshin në vendet e ndryshme.

Siç dihet, Federata e Shahut të Kosovës (FSHK) është e pranuar në atë ndërkombëtare FIDE dhe në disa organizata tjera botërore të shahut. Me këtë, edhe klubet e ndryshme të Kosovës kanë mundësi që të marrin pjesë në gara të ndryshme zyrtare.

Një ndër sukseset e fundit që kanë arritur shahistët kosovarë është ai i klubit të shahut “Prizreni” që ka marrë vendin e dytë në turneun rus të qyteteve nga e mbarë bota.

Nga Kosova në këtë turne u ftuan KSH Prizreni dhe KSH Vëllaznimi, ndërsa ftesa ka qenë e hapur për secilin vend të botës, kurse pas aplikimit të skuadrave në fjalë, janë publikuar edhe kushte dhe rregullorja e garave, ndërsa fituesi shpallej Kryeqytet i Shahut për vitin 2021 sipas League of Nations.

Në fazën grupore KSH Prizreni doli i pari në grup, derisa në ekip kishte shahistë si Valmor Bardhi (lider), Eldis Saiti, Ramadan Bytyqi, Ramadan Memaj, Besnik Aliu, Ilir Berisha, Zekë Tejeci, Bashkim Shkurti, Besim Kryeziu, Skender Imeri dhe Daver Tabaku.

“KSH Prizreni me këtë skuadër doli bindshëm në vend të parë të grupit dhe u kualifikua tutje në fazën finale të garës,” tha Bardhi, që bën të ditur se kushtet e shahistëve kosovarë krahasuar me ata ndërkombëtar janë të mjerueshme. 

Për fazën finale, duke parë përforcimet e bëra nga klubet tjera, ne morëm përforcime si Bedri Sadikun (mjeshtër ndërkombëtar), Avni Ermeni (mjeshtër i FIDE)

“Në fazën finale KSH Prizreni ka arritur të marr vendin e dytë në fund të garës, duke shënuar një sukses të rrallë,” ka bërë të ditur Bardhi për TopSporti.com, duke theksuar faktin se në këtë garë morën pjesë 216 shahistë nga mbarë bota.

Skuadra fituese e turneut ishte Otzma Ma’alot Tarshiha nga Izraeli, që ka kushte të hatashme për përgatitje të shahistëve të vetë.

Ndërsa Bardhi në fund ka falenderuar të gjithë shahistët që ndihmuan klubin në këtë garë, duke arritur sukses të jashtëzakonshëm krahasuar me kushtet dhe interesimin për këtë sport në vendin tonë.

“Derisa të tjerët kanë kushte tepër të mira për shah, ne ende bëjmë përgatitje nëpër çajtore, pasi që hapësirat tona janë të uzurpuara, ose thjesht nuk na ipet një hapësirë as në Qendër Sportive,” ka bërë të ditur ai.

Prizrenasit tash e 22 vite prej paslufte ushtrojnë në çajtore!!!

Kontribut të çmueshëm për KSH Prizreni treguan shahistët: FM Avni Ermeni, Hasan Krasniqi, Blerim Syla, Avdurrahim Dogani (të gjitha nga diaspora). Pastaj vendorët e bashkuar në klub për këtë garë: IM Bedri Sadiku, Blerim Gashi, Ramadan Bytyqi, Sylejman Kollari. Si dhe ata lokal: Eldit Saiti, Valmor Bardhi, Ilir Berisha, Besnik Aliu, Ramadan Memaj, Agadir Zenelaj, Skender Imeri, Bashkim Shkurti, Besim Kryeziu, Zekë Tejeci dhe Daver Tabaku.