Six Nations - 6 për ragbi

LINDJA E RAGBIT

Thuhet se derisa po luanin futboll në kohët e hershme, njëri nga lojtarët kapi topin në dorë dhe vrapoi drejt portës kundërshtare. Kështu lindi ragbi.
E gara më e vjetër e ragbit ka lindur në viti 1882. Katër vende të Mbretërisë së Bashkuar ishin shtyrë ndërmjet vete për më të mirin. Mposhtja e të tre kundërshtarëve tjerë sjell ‘Kurorën e Trefishtë’. Mposhtja edhe e Francës (e bashkuar në vitin 1910 në këtë garë) dhe Italisë (për arsye të çuditshme, në vitin 2000), sjell grand-slam. Këtë epitet kishte fituar Anglia vitin e kaluar.

Këtë vit, Anglia do të provojë të përsërit suksesin e vitit të kaluar, edicion mjaft i baraspeshuar në shumicën e ndeshjeve (pos atyre që përfshinin Italinë). Italianët janë dhe do të mbesin edhe pa titull të vetëm edhe pas këtij viti. Do të jetë vetëm edicioni i 18të i tyre, derisa Uellsi, Skocia, e Irlanda kanë qenë të pranishme në çdo edicion, plot 122 edicione. Franca ka 87 edicione, Anglia 120.

TITUJT

Tek titujt, në total Anglia ka 27, dhe falë titullit të fituar vitin e kaluar kanë lënë mbrapa Uellsin me 26. Franca ka 17, Skocia 15, Irlanda 13. Këto dy të fundit mund të befasojnë këtë vit. Në fakt, Irlanda do të duhej të ishte ndër favoritet kryesore.

Por, vet formati i garës, të cilit këtë vit i janë shtuar pikët bonus për rezultate të ndryshme (më shumë se 4 try më shumë pikë; humbje e ngushtë më pak pikë, etj), parashikimi absolut është i pamundshëm. Por, mund të veçojmë disa arsye pse një kombëtare mund të jetë favorite ndaj rivalëve tjerë. Së pari, orari.
Irlanda pret në javën e fundit Anglinë, derisa si mysafire udhëton në Olimpico të Romës, dhe në Uells ku fitojnë pothuajse rregullisht. Udhëtimi më i vështirë pritet të jetë në javën e parë kur janë mysafirë të Skocisë. Në fakt, fitorja e cilësdo nga këto dyja do të nxirrte në pah rivalin kryesor të anglezëve për pesë javët e mbetura.

MUNDËSITË

Skocezët do të duhej ta kishin më shumë problem në Twickenham kundër Anglisë. Por, kjo vjen në javën e katër dhe deri atëherë do të duhej të ishin përcaktuar se a janë favorit për titull, apo vetëm qejfprishës eventual të Anglisë. Java e fundit është kundër Italisë. Italianët mund të shijojnë fitoren eventuale ndaj Uellsit në javën e parë. Por, asgjë më shumë. Nejse, ndoshta edhe me Francën e cila po kalon jo ditë që janë mësuar të kenë.

Anglia mbetet favorite kryesore. Por, lëndimet do të mund ti mundojnë këtë vit. Vuriolat mungojnë, por Eddie Jones do të duhej të gjente alternativat më të përshtatshme të cilat e kanë kthyer Anglinë në një super-fuqi gjatë vitit 2016 duke fituar edhe vjeshtoret. Nëse asgjë, aty është Owen Farrell dhe gjuajtjet e tij precize.

Conte mund të ketë sjell mbrojtje në Ishull, por italianët nuk janë askund, as me mbrojtje e as me sulm. Megjithatë, ndryshimet në pikësim mund të shtyjnë italianët të humbin sa më ngushtë që është e mundur. 12 fitore dhe 72 humbje që nga inkuadrimi në këtë garë, nuk japin shumë shpresa për ta.

Një njeri që ka rregulluar së paku mbrojtjen tek Franca është Guy Noves. Janë përmirësuar në këtë repart dikur vonë vitin e kaluar, megjithatë kanë punë të shumta për të bërë, e lëre më të fitojnë titullin.

Irlanda ka qenë si një fëmijë i lazdruar herën e fundit në këtë garë. Disi kanë gjetur veten në vjeshtoret, por, do t’iu nevojitet më shumë përgatitje taktike dhe psikike për të kthyer titullin. Jonathan Sexton s’do të mjaftoj.

Skocia është e etur për sukses. Ka një optimizëm të fshehur, por gjithçka do të duhej të dilte në shesh qysh në ndeshjen e parë kundër Irlandës. Janë duke përparuar, por titulli i fundit ka mbetur gati dy dekada mbrapa, dhe kjo nuk kënaq skocezët.

Një gjë që duhet të rregullojnë uellsianët është mbrojtja. Kanë pësuar shumë pikë ndaj kombëtareve dytësore. Kanë qenë të mirë në vjeshtore dhe ndoshta me pak fat e pak përgatitje psikike do të mund të fitonin titullin e parë pas 3 viteve, ose së paku të jenë nënkampion.

Sidoqoftë, gjatë javëve të ardhshme na pret një edicion plot emocione dhe paqartësi i Six Nations. Pos, ndeshjeve ku luan Italia!