S’ka vend për befasi, Sllovenia në gjysmëfinale

Edhe pse ndeshja kaloi më ngushtë se që pritej, Sllovenia e kaloi pengesën e quajtur Letoni dhe e arriti gjysmëfinalen e EuroBasket2017.

Letonia u tregua skuadër tejet e mirë në çerekun e dytë, të cilin e mbylli me 32 pikë të shënuara dhe 17 të pranuara, mirëpo sllovenët u rikthyen në lojë që nga çereku i tretë dhe e mbyllën takimin me fitore me rezultat tejet të ngushtë 103-97, duke dëshmuar se kjo ishte një nga ndeshjet më të bukura të këtij kampionati të sivjetëm.

SKEMA DREJT FINALES

I zakonshmi Goran Dragic ishte ai që përsëri ia dhuroi skuadrës së tij fitoren, duke realizuar 26 pikë, 8 asistime e 6 kërcime, mirëpo për t’u përmendur padyshim është paraqitja e 18-vjeçarit Luka Doncic, i cili sonte ishte i jashtëzakonshëm me 27 pikë të shënuara. Në anën tjetër, 34 pikët e Kristaps Porzingis ishin të pamjaftueshme për të shkaktuar befasi dhe Letonia u detyrua të pajtohet me humbjen.

Në gjysmëfinale Slloveninë e pret Spanja në një duel i cili vendos përballë dy përfaqësuese që nuk dijnë për humbje që një kohë të gjatë.