Trepça kërkon fitore zyrtare ndaj Pejës

Skuadra mitrovicase ka deponuar ankesë në Federatën e Basketbollit të Kosovës, ku kërkon që Peja të dënohet për shkak të aktivizimit të Radomir Marojevicit, ku ky i fundit nuk ka pasur fletëlëshim dhe njëherit nuk ka të drejtë loje. 

Në rast të një dënimi të tillë, ndeshja do të regjistrohej me rezultat zyrtar 20-0 në të mirë të ekipit mitrovicas. 

Ndërkaq, kreu i Pejës, Art Gashi, në një prononcim për Kohën Ditore ka thënë se aktivizimi i Marojevicit është i drejtë. 

“Marojevic ka luajtur në ligën ballkanike. Lojtari që nuk është i licencuar në Kosovë nuk ka të drejtë loje në BIBL. Prandaj, nga ana jonë gjithçka është në rregull. Marojevic nuk ka marrë fletëlëshimin nga Federata e Serbisë dhe nuk do ta merr asnjëherë. Në bazë të rregulloreve, nëse për 7 ditë nuk mirret përgjigje nga Federata përkatëse, atëherë çështja kalon në duar të FIBA-së dhe lojtari bëhet i lirë,” është cituar të ketë thënë Gashi për gazetën në fjalë, duke arsyetuar vendimin për futje të lojtarit malazias në lojë. 

Peja e mposhti Trepçën në xhiron që shkoi me rezultat 88-71. 

Pikërisht Peja ka pasur ankesë në FBK për shkak se nuk i është lejuar paraqitja e dy përforcimeve të fundit, Jan Mocnik dhe Radomir Marojevic ndaj Sigal Prishtinës. FBK-ja kishte kundërshtuar ankesën e Pejës. 

Tani, për ankesën e Trepçës, pritet të vendoset gjatë ditëve në vijim. Trepça deri në ndeshje me Pejën nuk kishte pësuar asnjë humbje në kampionat.