Triple-double nga Moss, Bashkimi fiton dramën

Bashkimi ka arritur t’i kthehet fitoreve në BIBL, pas afro 50 ditëve. Ekipi prizrenas ka mposhtur Tiranën sonte në Sezai Surroi, pas ndeshjes që u vendos në minutat shtesë të takimit, pas vazhdimeve, 101-95.

Dy trajnerë grek në bankat e ekipeve nga Prizreni e Tirana, kanë pasur çka t’i thonë lojtarëve në çdo pushim të kërkuar.

DERBI E DRAMË

Ndeshja që u quajt derbi shqip i BIBL, doli të jetë derbi i xhiros në BIBL, e ndoshta edhe ndeshja më interesante e këtij stinori në këtë ligë.

Bashkimi e Tirana pas një lufte për çdo top në çdo cep të fushës së lojës, nuk kanë gjetur fituesin pas kohës së rregullt, duke barazuar 84-84 për të kërkuar fituesin në vazhdime.

Lufta e dy ekipeve për fitoren e tretë të stinorit dhe kapjen e vendit të tretë u kuptua pas 5 minutave shtesë në vazhdime.

TRIPLE-DOUBLE I MOSS

Amerikani i ardhur në janar, Aaron Moss, është treguar i jashtëzakonshëm sonte te Bashkimi. Ai ka kryer ndeshjen me triple-double dhe me indeks efiçence 53!

Moss ka shënuar 33 pikë, 11 kërcime e 11 asistime në fitoren e tretë të stinorit për Bashkimin.

TABELA AKTUALE E BIBL

MORINA ENERGJIK

Performancë të mirë ka dhënë edhe Altin Morina. I rikthyeri në klub ka shënuar 26 pikë, duke mos pushuar për asnjë minutë në ndeshje, derisa ka shtuar 6 asistime dhe 3 kërcime tjera, bashkë me 4 topa të rrëmbyer.

Vincent Zollo, në debutimin e tij ka regjistruar double-double prej 14 pikëve dhe 11 kërcimeve, derisa Mikaile Tmusic ka shtuar 20 pikë, pa pushuar asnjë minutë në ndeshje, shto këtu edhe 8 kërcime e 3 asistime në fitore.

PERFORMANCAT E TIRANASVE

Endrit Hysenagolli ka qenë më efikasi te Tirana. Ai ka shënuar 26 pikë e 13 kërcime, që në fund kanë dalë të pamjaftueshme për të shmangur humbjen e bardhekaltërve.

20 pikë ka shtuar edhe amerikani Edward Stowebridge, ndërsa double double ka regjistruar edhe Vladimir Brchkov i Tiranës, me 14 pikë e 10 kërcime.

Afër triple-double’it ka qenë edhe Gerti Shima. Ai ka luajtur pa pushim, 45 minuta, dhe ka shënuar 17 pikë, 9 kërcime e 9 asistime.

BILANCI

Paraqitje e mrekullueshme në fushë e dy ekipeve dhe luftë për çdo top, derisa numri i shikuesve në palestër zhgënjeu, pasi që u huq një show basketbollistik i vërtetë.

Pas kësaj ndeshjeje, Bashkimi del i treti në klasifikim, me bilanc 3-6, derisa Tirana mbetet e gjashta me bilanc 2-7.