Vjen befasia, Gjermania eliminon Francën

Me të filluar faza e eliminimit direkt, vjen edhe befasia e parë në EuroBasket2017.

Pas Sllovenisë, skuadra e dytë çerekfinaliste e EuroBasket2017 është Gjermania.

Gjermanët arritën që ta eliminojnë Francën, favoriten absolute për të kaluar në çerekfinale, falë një super loje të zhvilluar në pjesën e dytë të ndeshjes, pasi që dy çerekët e parë i takuan francezëve.

Të udhëhequr nga i zakonshmi Schroder dhe me lojën e mirë të Theis, gjermanët me shumë mund arritën ta fitojnë këtë takim, ndërsa fituesi nuk dihej deri në sekondat e fundit, me francezët që u afruan në 81-79 falë një trepikëshi të shënuar nga Fournier. Në sekondat e fundit të takimit, Nando De Colo i francezëve provoi për 3 pikë që ta barazonte rezultatin, mirëpo u tregua i pasaktë dhe ndeshja përfundoi me rezultat 84-81 në të mirë të Gjermanisë.

Duhet përmendur që rol në këtë rikthim të gjermanëve sot kishte edhe numri i madh i trepikëshave të shënuar, sidomos në çerekun e katërt. çerek në të cilin gjermanët shënuan 6 nga 8 treshet e tyre të ndeshjes.

EUROBASKET 2017 - SKEMA

Më i dalluari te gjermanët sonte ishte Theis me 22 pikë, ndërsa u ndihmua edhe nga Schroder me 21 pikë, e në anën tjetër në sy ra paraqitja e shkëlqyeshme e Fournier me 27 pikë të shënuara.

Kjo është hera e parë që Gjermania e prek çerekfinalen që nga viti 2007.

Në çerekfinale, Gjermania takohet me fituesin e duelit Spanjë-Turqi.