Ahmet Kandemir merr drejtimin e Manisa BB

Trajneri që përfundoi stinorin 2022/23 te Prishtina në Superligë të Kosovës, duke arritur gjysmëfinalen e playoffit dhe duke luajtur finalen e Kupës së Kosovës, Ahmet Kandemir, ditë më parë është zyrtarizuar si trajner i ri i ekipit turk Manisa BB.

Sipas njoftimit në faqen zyrtare të Manisa BB, Kandemir ka nënshkruar kontratë njësezonale me ekipin në fjalë dhe do t’i drejtojë ata përgjatë stinorit 2023/24. Manisa BB është pjesë e Superligës së basketbollit turk në stinorin e dytë me radhë dhe këtë stinor po kërkon rezultate edhe më të mira aty.

Me këtë, tashmë është e sigurt se Prishtina do të kërkojë trajner të ri për edicionin 2023/24 të Superligës së Kosovës. Bardhekaltërit deri tash kanë bërë të ditur se kanë angazhuar në skuadër tre lojtarë për edicionin e radhës, ku kanë rikthyer Muhamedali Janjevën nga KB Prizreni, pastaj kanë siguruar shërbimet e Devoe Joseph nga Peja si dhe kapitenit të Pejës, Arti Hajdari.◼️