Bashkimi fiton thellë derbin lokal në Kupë, për të siguruar gjysmëfinalen

Bashkimi ka bërë një paraqitje tepër të mirë në përballje ndaj Prizrenit 16 sonte në kuadër të çerekfinales së Final 8 të Kupës së Kosovës, për ta shkruar emrin në gjysmëfinale të garës.

Portokallezinjtë kanë kaluar shumë më lehtë sesa që është pritur rivalin lokal duke e mposhtur me 25 pikë dallim, duke e ndalë në 69 pikë, ndërsa kanë shënuar 94 pikë, në përfundimtaren 69-94 [15-30, 21-10, 18-28, 15-26].

Mungesa e Koljevic dhe pikët e para të Fells

Humbjes së Prizrenit 16 i ka kontribuuar edhe mungesa e playmakerit të ekipit, Ivan Koljevic, që nuk është në ekip, derisa të tjerët nuk ndezën pa malazezin me përvojë.

Njëri ndër lojtarët më të mirë të bardhezinjëve, Courtney Fells, pikët e para i shënoi në minutën e fundit të çerekut të dytë të ndeshjes, që tregon shumë për lojën e ekipit të Arbnor Rifatit sonte.

SKEMA E KUPËS SË KOSOVËS

Gjithsesi, Bashkimit në anën tjetër i shkonte për dore thuajse gjithça, ndërsa qendra e re e ekipit John Florveus shkëlqeu nën kosh, duke kryer lojën me double-double prej 22 pikëve, 11 kërcimeve dhe duke bërë 5 bllokada!

Valon Bunjaku superior

Julien Lewis shutoi 4/7 për tre pikë, ku deri vonë kishte saktësi prej 80% për të kryer lojën me saktësi 57% për tri pikë.

Por, më i dalluari te Bashkimi ka qenë i gjithanshmi, reprezentuesi Valon Bunjaku që për pak ishte ta kryente lojën me triple-double, pasi që shënoi 16 pikë, bëri 9 kërcime e shtoi 8 asistime në llogari të tij gjatë kësaj fitoreje të ekipit të drejtuar nga kroati Branimir Pavic.

Dueli i radhës

Me fitore, Bashkimi kalon në gjysmëfinale të Kupës ku e pret kampioni aktual i Superligës, Ylli. Ndeshja do të luhet të premten, në Karagaç të Pejës.

Në anën tjetër Prizreni 16 me këtë ndeshje eliminohet nga Final 8 e Kupës së Kosovës.