Bashkimi kërkon fitore për barazim serie, Prishtina titullin

Bashkimi nesër mbrëma do të zhvillojë ndeshjen e fundit të stinorit para publikut të vetë në Sezai Surroi të Prizrenit.

Sigal Prishtina ka epërsi 2-1 në serinë finale dhe në rast të fitores së bardhekaltërve, ata do të shpallen kampionë të Kosovës për stinorin 2016/17.

Nëse fiton Bashkimi, seria do të bëhet 2-2 dhe ndeshja e fundit përcaktuese do të zhvillohet në Pallatin e Rinisë dhe të Sporteve në Prishtinë, për të gjetur ekipin që do të ngris trofeun më të rëndësishëm në vend.

Thërrasin tifozëritë

Para ndeshjes që do të zhvillohet nesër, Bashkimi, por edhe Prishtina kanë bërë thirrje përmes faqeve të tyre zyrtare në Facebook, që tifozëritë e tyre të jenë të pranishme në numër sa më të madh të mundshëm në përballjen e së mërkurës mbrëma që nis në ora 19:00.

Si Arpagjik’t ashtu edhe Plisat kanë qenë të pranishëm në çdo ndeshje finale dhe kanë treguar shembull duke mos fyer fare ekipin kundërshtar e as tifozërinë kundërshtare dhe duke anuar vetëm për skuadrën që e duan.

Bashkimi po kërkon titullin e parë kampion të Kosovës së pasluftës, ndërsa Sigal Prishtina të 12-tën në total.

Refer kryesor i ndeshjes së nesërme është maqedonasi Marjan Micevski.

Fitoret, sipas referëve!

Në ndeshjen e mëparme të serisë finale, Bashkimi ka fituar ndeshjen kur ka qenë referi kryesor maqedonas, ndërsa Sigal Prishtina ka fituar 2 ndeshjet ku referi kryesor ka qenë turk!

Sigal Prishtina udhëheq serinë finale 2-1. Kampion shpallet ekipi që së pari arrin 3 fitore. Pra, derisa për Bashkimin kjo ndeshje pritet të jetë jetike, bardhekaltërit do të kenë mundësinë edhe në një ndeshje.