Drita e pagabueshme, shkon +11 në krye!

Liderja e Superligës dhe favoritja aktuale për ta fituar titullin kampion këtë sezon, Drita e Gjilanit, sot shënoi fitore ndaj Ferizajit në shtëpi.

Këtë të fundit Drita e mposhti 2-0 (Albert Dabiqaj , 54’, Veton Tusha 70’), për ta thelluar kështu edhe më tepër distancën ndaj Ballkanit në krye, me suharekasit që u mposhtën sot në Malishevë.

Gjatë pjesës së parë, Drita ishte më kërkuese, por gol nuk pati. Rrjedhimisht, 45-minutëshi i parë u mbyll pa gola.

TABELA AKTUALE

Me të filluar pjesa e dytë, goli nuk vonoi shumë. Krosimin e Egzon Bejtullait, në portë e çoi me kokë Albert Dabiqaj (54’), për epërsinë e vendasve. Ky ishte goli i 10 personal i Albert Dabiqajt në këtë sezon të Superligës, një sezon fantastik për të.

Për momentin, vetëm Mevlan Zeka (13) ka shënuar më shumë gola se Albert Dabiqaj në ligë, ndonëse ky i fundit është mesfushor.

Fitorja e Dritës u vulos me golin e Veton Tushës në minutën e 70’ dhe kështu ndeshja u mbyll me rezultatin përfundimtar 2-0.

Përvëç që prin bindshëm në krye të Superligës, Drita e Zekirija Ramadanit për momentin ka edhe sulmin e mbrojtjen më të mirë në ligë. Në anën tjetër, Ferizaj për momentin është jashtë zonës së rrezikshme, por ende ndodhet në garë të ngushtë në luftën për mbijetesë.