Bashkimi zgjohet vonë, Peja në finale!

Me fitoren e Pejës është mbyllur gjysmëfinalja e parë e Final Four-it që po zhvillohet në ‘Minatori’ të Mitrovicës.

Pejanët ishin skuadër më e mirë që nga fillimi i takimit e deri në fillim të çerekut të katërt, duke e dominuar skuadrën e Bashkimit në çdo aspekt, ndërsa prizrenasit formën optimale e gjetën vetëm në çerekun e fundit, çerek në të cilin shënuan plot 26 pikë dhe pranuan vetëm 13, mirëpo ishte shumë vonë, pasi që epërsia e Pejës pas 3 çerekëve ishte mjaft e lartë dhe rikthimi senzacional ishte i pamundshëm.

Çereku i parë dhe ai i dyti ishin më të ngushtë, me Bashkimin që arriti të bënte më tepër rezistencë, ndërsa që nga fillimi i çerekut të tretë, Peja e tregoi forcën dhe krijoi epërsi të konsiderueshme, e cila doli të ishte vitale në epilogun final të takimit, përkundër përpjekjeve maksimale të Bashkimit deri në sekondat e fundit.

Në finale, Peja e pret fituesin e duelit mes Trepçës dhe Prishtinës, duel i cili zhvillohet sonte me fillim nga ora 20:00.

Më të dalluarit te Peja sonte ishin Alban Veseli me 19 pikë, 7 kërcime e 1 asistim dhe Noah Dahlman me 11 pikë e 3 kërcime, kurse te Bashkimi u veçuan Kayel Locke me 20 pikë e 7 kërcime dhe Justin Black me 17 pikë, 9 kërcime e 1 asistim.

Sa i përket tifozërive, edhe ‘Arpagjikët’ edhe ‘Shqiponjat’ arritën pak më vonë në sallë, pra nuk ishin të pranishme që nga fillimi i ndeshjes, mirëpo gjithsesi atmosfera e krijuar nga të dyja palët ishte shumë e mirë.

BASHKIMI

PEJA