Britania e Madhe eliminon Kosovën U16

Përfaqësuesja e Britanisë së Madhe U16 ka qenë shumë më e fortë se Kosova U16 në përballjen që posa përfundoi në Sofje, ku po zhvillohet Kampionati Europian i Divizionit B në basketboll.

Britanikët dallimin kryesor e kanë bërë në çerekun e fundit të lojës, edhe pse gjatë pjesës më të madhe ishin në epërsi, por jo shumë të madhe.

Gjithsesi, çereku i fundit ka qenë i dobët për Kosovën, pasi që ekipi mbeti pa lojtarin kryesor të saj, Erhan Sholla, për shkak të 5 gabimeve personale. Në fund, Kosova U16 - Britani U16 35-57.

Sholla përkundër se luajti vetëm 24 minuta, ka qenë më i dalluari te Kosova U16 duke shënuar double-double prej 16 pikëve, 11 kërcimeve dhe 1 asistim për bashkëlojtarët e tij.

Asnjë lojtar tjetër i Kosovës U16 nuk arriti të shënojë pikë dyshifrore në këtë përballje, derisa Nderim Ratkoceri ka qenë më efikasi në ekip pas Shollës, me 7 pikë të shënuara dhe 9 kërcime.

Derisa Britania e Madhe është lidere e Grupit D me bilanc 4-0 pas 4 ndeshjeve, Kosova ka bilanc 1-3.

Pas kësaj ndeshjeje, Kosova do të zhvillojë edhe duelin e fundit të Grupit D, ndaj Gjeorgjisë, para se të luajë për pozitën përfundimtare në Europian.

Me këtë humbje, Kosova humb gjasat për kualifikim të mëtutjeshëm, por do të zhvillojë duelet për përcaktimin e renditjes përfundimtare në Europianin U16, në ditët në vijim.