Krizës nuk po i duket fundi!

Manchester City është pa fitore përsëri! Me një fitore në 13 ndeshjet e fundit në të gjitha garat, ekipi i Josep Guardiolës është në krizë të thellë të rezultateve, ndërsa sot edhe Erling Haaland pa penalltinë e tij të mbrojtur nga Jordan Pickford, derisa Everton si mysafir shkëputi pikë në “Etihad” duke barazuar me Manchester Cityn 1-1 [Bernardo Silva 14’ - Iliman Ndiaye 36’]!

Starti ishte thuajse perfekt për “qytetarët” që avancuan me golin e Bernardo Silvës. Phil Foden për pak e bëri 2-0! Por, në anën tjetër një rast i parë serioz për Evertonin u shndërrua në gol, kur Iliman Ndiaye shënoi pas një krosimi të Abdoulaye Doucouresë. Në pjesë të dytë City fitoi penallti, kur Vitalii Mykolenko rrëzoi Savnihon në zonë. Por, Haalandit goditjen nga pika e bardhë ia mbrojti Pickford. Në vazhdim të aksionit Haaland shënoi - por ishte ofsajd!

Kampioni aktual i Anglisë është në pozitë të shtatë për momentin në renditje tabelare me 28 pikë nga 18 ndeshje, ndërkaq Everton është i 15-ti me 17 pikë nga 17 ndeshje të luajtura.