Ruud Van Nistelrooy mbetet në Premier Ligë

Trajneri 48 vjeçar Ruud Van Nistelrooy është emëruar edhe zyrtarisht si trajner i ri i Leicester Cityt në Premier Ligë. “Dhelprat” kanë zyrtarizuar holandezin mbrëmë, ndërsa kanë bërë të ditur se ai do të merr drejtimin e skuadrës menjëherë, duke nisur që nga përballja e sotme ndaj Brentfordit si mysafir ku do të qëndrojë si shikues, ndërsa prej të dielës nis detyrën me punë të përditshme.

Ruud Van Nistelrooy sulmuesi legjendar i Manchester Unitedit, Real Madridit e Hamburgut dhe Malagës, së fundi bëri detyrën e ndihmës-trajnerit të Manchester Unitedit nën drejtimin e Erik Ten Hagut. Me largimin e Ten Hagut nga detyra, ai drejtoi ekipin suksesshëm pa humbje në përballjet tranzicionale deri sa “Djajt e kuq” zyrtarizuan dhe sollën në ekip Ruben Amorimin.

Sukseset e tij me PSV Eindhovenin dhe përvoja e tij në ekipe të mëdha pritet të sjellë të nevojshmen te Leicester City, që ka sqaruar se ka nënshkruar me RVN deri më qershor të vitit 2027. “Jam krenar dhe i emocionuar. Secili me të cilin flas për Leicester Cityn është i entuziazmuar. Kaën tregime të mira që më sqarojnë, veçanërisht me njerëzit që punojnë në klub, tifozët dhe natyrisht historia e viteve të fundit e ekipit është tejet impresive. Mezi pres të fillojë dhe të njoftohem me secilin, për të dhënë gjithçka për klubin.” ka thënë 48 vjeçari për faqen zyrtare të klubit.

Leicester City që këtë stinor iu rikthye Premier Ligës nga Championshipi, ditë më parë largoi Steve Cooperin nga posti i trajnerit! Ekipi nuk ka shijuar fitoren në 5 ndeshje të fundit, ndërsa momentalisht është me 10 pikë nga 12 ndeshje, duke qëndruar në pozitë të 16-të të renditjes tabelare të Premier Ligës, ku pozitat 18-20 bien nga liga. Ipswich Town në pozitën e 18-të ka një pikë më pak se Leicesteri!