Pep Guardiola vazhdon me Manchester Cityn

I ka ardhur fundi spekulimeve lidhur me të ardhmen e Josep Guardiolës dhe ekipit të tij Manchester City! Pas përfoljeve të shumta për stinorin e fundit të tij si menaxher i ekipit dhe mundësinë e kalimit diku tjetër, Manchester City në pasditen e sotme ka bërë të ditur se ka arritur marrëveshjen dhe ka vazhduar kontratën edhe për dy stinroë tjerë me Guardiolën si trajner i skuadrës së “qytetarëve” të Manchesterit.

“Manchester City do të thotë shumë për mua. Ky është stinori im i nëntë këtu dhe kemi përjetuar gjëra të mrekullueshme këtu. Kam ndjenja shumë të veçanta për këtë klub. Për këtë edhe jam i lumtur që do të qëndrojë edhe dy stinorë tjerë këtu. Ju falemnderit që më besuat Khaldoon (Al Mubarak), Ferran (Soriano), Txiki (Begiristain), lojtarë dhe natyrisht tifozë... dhe secilit që është i lidhur me klubin. E kam thënë shumë herë, po e them prapë, kam pasur gjithçka që një trajner/menaxher do të mund të dëshironte këtu në City dhe për këtë jam falenderues përjetë. Shpresojmë që të shtojmë edhe disa trofe në koleksionin tonë të të fituarave deri tash. Do të fokusohemi këtu,” ka thënë tekniku spanjoll për faqen zyrtare të klubit, pasi që nënshkroi kontratën e re me të kaltërit nga “Etihad”.

Guardiola përndryshe ka regjistruar rekord me Cityn, të cilin nuk e ka bërë asnjë ekip në Premier Ligë, duke fituar katër herë radhazi Premier Ligën. Këtë gjë, nuk e ka arritur as Sir Alex Ferguson në kulminacion të tij me Manchester Unitedin, e as Jose Mourinho me Chelsean e Arsene Wenger me Arsenalin.  Në total Pep ka fituar 18 trofe të mëdhenjë në tetë stinorë të plotë me Cityn, prej të cilave gjashtë herë Premier Ligën. Përndryshe ai ka arritur të fitojë edhe tripletën e madhe ku llogaritet: titulli kampion i Premier Ligës, titulli i Ligës së Kampionëve dhe Kupa e shtetit ku garon skuadra - të cilën e arriti në stinorin 2022/23.