Zirkzee në huazim, të lirohet vendi për Gyokeresin

Me të arritur trajneri i ri në ekip, kanë filluar menjëherë përfoljet në mediat angleze lidhur me lojtarët e Manchester Unitedit. Ruben Amorim arriti te Manchester United dje zyrtarisht, ndërsa do të punojë me futbollistët që nuk kanë udhëtuar për ndeshjet e kombëtareve në kuadër të Ligës së Kombeve në UEFA dhe të tjerët në kualifikime përkatëse në Konfederatat tjera.

Sipas Daily Mail, Manchester United dëshiron të huazojë futbollistin e ardhur për rreth 50 milionë euro përgjatë kësaj vere në ekip, Joshua Zirkzee. Kjo, pasi që Amorim konsideron si opsion ardhjen e sulmuesit me të cilin punoi te Sporting, suedezin Victor Gyokeres.

Zirkzee 23 vjeç erdhi nga Bologna, por nuk arriti të impresionojë këtë stinor, derisa shënoi vetëm një gol në 17 paraqitje për klubin. Për këtë Gyokeres, që është në formë tepër të mirë në Lisbonë, pritet të jetë përforcimi i madh i ekipit të djajve të kuq.

“Shefi i ri Amorim gjithashtu nuk është parapëlqyes i tipit të lojtarit si holandezi. Besohet se ai është i gatshëm të sjellë yllin e tij nga Sportingu në “Old Trafford”. Me këtë rast, Zirkzee do të mund të bëhej zgjedhja e tretë e sulmit të Manchester Unitedit dhe do të mbetej edhe me më pak minuta.” — ka shkruar ndër të tjera Daily Mail sot.