Dramë në “Shani Nushi”, Rahoveci mposht Prizrenin

Dueli ndërmjet Rahovecit dhe Prizrenit dha një përballje shumë të nxehtë dhe interesante mes dy skuadrave të pjesës së epërme të Superligës.

Fitores në këtë ndeshje iu gëzua skuadra e Rahovecit, por epilogu i ndeshjes mund të ishte krejtësisht ndryshe po të ishte i saktë në tentimin për tri pikë në sekondat e fundit basketbollisti amerikan i Prizrenit, Brandon Scott.

Rahoveci në fillim të ndeshjes krijoi epërsinë më të lartë prej 9 pikëve, 16-7, por me dy tripikëshat e Edmond Kryeziut dhe pikët e Elliott Cole dhe Somel Shaqirit, kjo epërsi e vreshtarëve u shkri shpejt dhe çereku i parë përfundoi me rezultat 19-21 në të mirë të Prizrenit.

Në çerekun e dytë Rahoveci pati një dominim të lehtë dhe në pushim shkoi me 5 pikë epërsi, 48-43, falë shënimit në sekondat e fundit të amerikanit të Rahovecit, Deshon Minnis.

Prizreni e riktheu epërsinë në të mirë të tij para fillimit të çerekut të fundit dhe ate e mbajti deri në 5 minutëshin e fundit, kur Arian Qallaku shënoi për rezultatin 88-87 në të mirë të vendasve. E nga ai moment rezultati ndryshonte vazhdimisht në të mirë të njërës apo tjetrës skuadër, deri në momentin më kritik të ndeshjes, kur edhe 1 minutë e gjysmë para fundit Atik Koshi e vjedh topin dhe në kundërsulm Deshon Minnis shënon për rezultatin 100-96.

Në fund, rastin ideal për t’u shndërruar në hero e humbi Brandon Scott në tentimin e tij për tri pikë dhe Rahoveci fitoi me rezultat 101-99.

TABELA AKTUALE

Më i miri në ndeshje pa dyshim ishte Elliott Cole i Prizrenit me 43 pikë, derisa te Rahoveci u dallua Arian Qallaku me 25 pikë.

Me këtë fitore, Rahoveci vazhdon të rrugëtojë pa humbje duke e regjistruar fitoren e pestë me radhë, derisa për Prizrenin kjo ishte humbja e dytë për këtë edicion pas asaj kundër Bashkimit.