Efes merr McCollumin e Galatës

Anadolu Efes nuk po ndalet në tregun veror të transferimeve. Ekipi turk pak më parë ka bërë të ditur se përforcimi i radhës në skuadër është amerikani Errick McCollum.

McCollum, që stinorin e kaluar e përfundoi te Galatasaray i Stambollit, ka pasur mesatare prej 13.7 pikëve, 3.1 kërcimeve dhe 2.1 asistimeve.

Ai në stinorin 2013/14 ka qenë koshashënuesi më i mirë i elitës së basketbollit grek, derisa ishte pjesë e Panioniosit, me mesatare prej 17.7 pikëve për ndeshje. Njejtë, në vitin 2015 këtë sukses e arriti edhe në elitën e basketbollit kinez, me mesatare prej 39.6 pikëve për ndeshje!!!

Anadolu Efes në stinorin e kaluar të Euroligës ka përfunduar në vend të gjashtë të klasifikimit, ndërsa u eliminua në Play-Off nga nënkampioni i Europës, Olympiacos.

McCollum (29 vjeç, 188 cm) ka nënshkruar kontratë 1+1 vjeçare me ekipin e ‘birrarisë’.